Morgunblaðið hefur breyst. Það er ekki lengur fréttablað, nema að litlu leyti, en miklu nær gamaldags áróðursriti fyrir þrönga hagsmuni.

Þeir um það, sem þar véla …

Stundum má hlæja að þessu, svo sem eins og fyrr í vikunni þegar blaðið fjallaði um rammaáætlun um verndun og nýtingu náttúrusvæða. Á forsíðunni var fyrirsögnin í þá veru að Bitra og Norðlingaalda yrðu, samkvæmt rammanum, færð niður í verndarflokk.

Já, það er gott að hafa þetta á hreinu; sumsé hvað snýr upp og hvað niður.

Mogginn veit það náttúrlega, gildishlaðinn og gassalegur …

-SER.

Úrsögn Guðmundar Steingrímssonar úr Framsóknarflokknum er eðlileg.

Þar fór víðsýnn maður úr þröngum flokki …

-SER.

Líklega verður einum harðstjóranum færra í dag. Það er gleðiefni. Þessum körlum hefur fækkað í ár, einkum í norðanverðri Afríku.

Lýðræðisbylgjan sem rís í löndum múslima er athyglisverð. Hún sækir krafta sína í æ þéttara upplýsinganet sem bindur hnúta sína um allar álfur, óháð landamærum, menningu og stjórnarfari.

Upplýsing mylur einræði. Frjáls fjölmiðlun hrekur harðstjórn. Og fólkið fær vonandi að ráða ráðum sínum í kjölfarið …

-SER.

Mikilvægast við fjárlagagerð næsta árs er að halda aftur af skattahækkunum á venjulegt fólk og venjuleg fyrirtæki.

Hagvextinum er haldið uppi af einkaneyslu, jafn traustvekjandi og það nú er, en þar af leiðandi ber ekki að höggva í vanalegan knérunn fjölskyldufólks ög meðalstórra fyrirtækja sem eru þjóðarbúinu mikilvægust nú um stundir.

Ég hef talað fyrir auknum hagvexti á forsendum atvinnuppbyggingar. Vitaskuld eru fyrirtæki vör um sig; oflánastefna veislutímans hefur skaðað þau um of … og fyrir vikið fara þau sér hægt í uppbyggingu og frekari fjárfestingum. Það er ekki ríkisstjórninni að kenna, heldur aðstæðum … klikkaðri hagstjórn hægri stefnunnar, sem kunni sér ekkert hóf í þensluhvetjandi skattalækkunartilburðum á meðan keyrt var fram úr fjárlögum á ofsahraða, ár eftir ár …

Breikkun skattstofna er vissulega möguleg, en ekki sjálfgefin af ofangefnum forsendum. Ytri og innri aðstæður eru einfaldlega óvissu hlaðnar.

Ég tel að skera megi meira niður í ríkisbúskap. Þar hefur verið varlega farið. Mjög varlega. Störf hafa verið varin í hvívetna. Um 400 ríkistörf hafa tapast, aðallega í heilbrigðiskerfi, á meðan vel yfir 20 þúsund störf hafa tapast á almennum vinnumarkaði!

Þetta er þokkaleg skekkja.

Samdráttur í opinberri þjónustu, vegna hrunsins, kallar á fækkun starfa á þeim vettvangi. Það segir sig sjálft. 400 manna fækkun á ríkisvettvangi er dropi í hafið þegar hugsað er til þess að opinberu starfsfólki fjölgaði um 37 prósent á fyrsta áratugi aldarinnar.

Efnahagshrunið hefur ekki þýtt hrun á opinberum vinnumarkaði. Eiginlega þvert á móti.

Það er umhugsunarvert.

Þessvegna hækkum við ekki skatta á venjulegt fólk og venjuleg fyrirtæki. Við erum nefnilega enn að þjónusta á opinberum vettvangi umfram nauðsyn og umfram getu.

Við getum klárlega ennþá sparað hjá ríkinu. Sú leið á að vera jafn sjálfsögð og skattaleiðin …

-SER.

Sumarið í lífi mínu hefur svolítið farið í það að horfa út um gluggann við norðanverðan Austurvöll; sumsé ofan af annarri hæð nefndasviðs Alþingis. Langir fundir leiða mann að ljóranum, enda freistandi að virða fyrir sér mannlífið í miðju borgarinnar.

En þetta er þankinn; óskaplega er Austurvöllurinn ljótur. Eiginlega arfaljótur. Ekki einasta eru hellulagnirnar í kringum hann að mestu leyti úr skorðum - og fyrir vikið stórhættulegar - heldur eru nýlagðar torfurnar á miðju hans ýmist dauðar, í andarslitrunum eða ofþornaðar.

Og svo er afmælisbarnið á stallinum, eirsperrtur Jón Sigurðsson, allur í skít eins og vanalega.

Þetta er umhugsunarvert.

Mannlífið við völlinn hefur vart verið fegurra, en völlurinn sjálfur sjaldan ljótari …

-SER.

Sjónvarpsþættirnir Með okkar augum , sem sýndir hafa verið í Ríkissjónvarpinu í sumar, hafa vakið verðskuldaða athygli - og í reynd slegið í gegn. Síðasti þátturinn er á dagskrá í kvöld, en framhald verður væntanlega á þáttagerðinni, ef marka má viðbrögðin.

Fölskvalaus áhugi þáttastjórnenda, jafnt á samfélagi sínu og samtíðarfólki, skín af hverjum þætti - og nálgunin er oft og tíðum óviðjafnanlega einlæg. Satt að segja man ég ekki eftir manneskjulegri þáttum í sjónvarpi allra landsmanna.

Hér er brotið í blað. Með okkar augum eru fyrstu þættir sinnar tegundar á Íslandi þar sem fólk með þroskahamlanir starfar báðum megin linsunnar. Með aðstoð fagfólks tekst því að búa til afbragðsgóða þætti sem eru fyllilega á pari við það besta sem gerist í faginu hér á landi.

Aðalatriðið er þó innsýnin. Þættirnir opna heim. Þeir breikka samfélagið og hrinda burt hindrunum. Ísland er ekki eintóna mannheimur, heldur margþættur og litríkur. Og allur eiga erindi. Allir hafa erindi …

Svona þættir stækka samfélagið …

-SER.