Ég tek ofan fyrir þeim faghjónum Páli Magnússyni og Sigrúnu Stefánsdóttur í Efstaleitinu sem skipað hafa neðrihæðunum að senda úrslitaþátt Útsvars frá Hofi á Akureyri.

Náttúrlega. Úrslitaliðin koma frá Akureyri og Norðurþingi.

Það hefði verið pínlegt fyrir útvarp ríkisins að kalla bæði liðin suður, enda á þjóðarleikvangur RÚV að vera landið allt og miðin.

Annars er RÚV að taka sig á í innlendri dagskrárgerð; Nornin virkar vel á mig og Landinn orðinn eitt allra besta íslenska efnið sem ríkið hefur framleitt.

Meira af svo góðu …

-SER.

Ég sendi fjármálaráðherra eftirfarandi fyrirspurn í dag vegna umræðu og skrifa um skattaúttekt háskólaprófessors sem enginn virðist vita hvort gerð hafi verið. Kostnaðurinn ku nema á annan tug milljóna. Ég óska skriflegs svars við fyrsta hentugleika:

1. Hver var heildarkostnaður fjármálaráðuneytisins vegna samnings sem Félagsvísindastofnun Háskóla Íslands gerði við ráðuneytið árið 2007 um mat á áhrifum skattbreytinga á árunum 1991 til 2007?

2. Hver óskaði eftir samningnum, að hálfu ráðuneytisins?

3. Hve margar voru greiðslurnar, hver var upphæð hverrar greiðslu – og hvenær voru þær greiddar?

4. Hver / hverjir fengu umræddar greiðslur?

5. Hefur verkefninu verið skilað til ráðuneytisins – og ef svo er; hvernig mun það nýtast ráðuneytinu?

6. Getur almenningur skoðað verkefnið, hafi því verið skilað?

7. Mun ráðuneytið óska eftir endurgreiðslu, hafi verkefninu ekki verið skilað?

8. Leitaði fjármálaráðuneytið til háskólasamfélagsins með fleiri verkefni af þessu tagi á síðasta áratug?

9. Hverjar voru heildarverktakagreiðslur ráðuneytisins til háskólasamfélagsins á þessum tíma?

Ég bíð spenntur …

-SER.

Líklega er meirihluti fyrir því á Alþingi að bæta við aflaheimildum í nokkrum helstu botnfisktegundunum, einkanlega þó þorski. Hann er enda farinn að vaxa úr sér svo horfir til vandræða í fiskverkun víða um land.

Ég hef talað fyrir því að auka aflaheimildir við þær aðstæður sem nú ríkja í hafi og efnahag. Sjómenn og fiskverkendur, sem ég er í ágætu samtali við, eru einhuga um að aldrei hafi fiskgengd verið jafn mikil það sem af er þessari öld - og pundið aldrei verið þyngra. Við þessar aðstæður er ekki ónýtt að spyta sosum eins og 20 milljörðum inn í hagkerfið með yfir 20 þúsund tonna aukningu heimilda - og binda þau jafnvel við landvinnslu sem skilaði yfir 1000 störfum á stundinni.

Aukning aflaheimilda er hraðvirkasta hagvaxtartækið sem landsmenn hafa í höndunum. Og þörfin er skýr; aukinn hagvöxtur eða aukinn niðurskurður.

Við eigum að taka tillit til reynslu og vísinda í auðlindamálum okkar. 25 þúsund tonna aukning aflaheimilda, jafnvel næstu 3 árin, eru innan áhættumarka - og viðheldur vexti stofnsins.

Ég hyggst spyrja hæstvirtan sjávarútvegsráðherra á Alþingi í dag hvað tefji för í þessu efni …

-SER.

Þungi hagræðingarinnar í rekstri ríkisins hvílir á herðum kvenna. Þetta staðfesti fjármálaráðherra við fyrirspurn minni á Alþingi í gær.

Það hefur fækkað um 540 stöðugildi hjá ríkinu á tveimur síðustu árum - og er þar af talsverðu að taka, en fjöldi ríkisstarfsmanna er um 21 þúsund. Hlutur kvenna í niðurskurðinum er 470. Hlutur karla er 70.

Þetta er sláandi munur.

Hitt vekur kannski enn meiri athygli. Það hefur fækkað um 12 stöðugildi í öllum ráðuneytunum á þessum tíma; að meðaltali um 1 starf í hverju ráðuneyti - og það á versta kafla íslensks efnahagslífs.

Þetta styður ef til vill þá kenningu mína að karlar stjórna hagræðingunni og menn skera frekar niður frá sér en nær sér …

-SER.

Æðsta ráð Samtaka atvinnulífsins er að rífa sundur friðinn á vinnumarkaðnum. Það þegir yfir tuga prósenta launahækkun helstu ráðamanna bankanna, en geldur varhug við því að almenn laun verði hækkuð umfram örfá prósent.

Formaður Samtaka atvinnulífsins heitir Vilhjálmur Egilsson. Hann var gestur á þingflokksfundi Samfylkingarinnar nýverið. Þar svaraði hann spurningu minni um getu atvinnulífsins til að hækka almenn laun. Hans orð voru þau að ef farið yrði að ýtrustu kröfum - svona um það bil 30 prósenta hækkun - færi þjóðin aftur á hausinn.

En hverjir fara á undan með góðu fordæmi? Hverjir sitja í æðstu ráðum Samtaka atvinnulífsins? Hverjir nema bankastjórar Arion banka og Íslandsbanka sem í skjóli ríkisábyrgðar og gjaldeyrishafta hækka til sín launin um akkúrat þessi 30 prósent sem Vilhjálmur nefndi svo eftirminnilega á fundinum.

Það er ekkert slor …

Við erum að endurreisa þjóðfélag. Það má líkja okkur við björgunarsveitarfólk sem vinnur í kapp við tímann við ömurlegar aðstæður. Það hafa allir tekið á sig meiri vinnu fyrir minna kaup, jafnvel enga vinnu, ekkert kaup.

Enn er þó til fólk sem lætur kaupa sig til nýrra starfa. Og lítur á það sem meginverkefni að hækka við sig laun á meðan viðskiptavinirnir semja um skuldaframlengingu.

Í björgunarsveitunum fengi svona fólk ekki einu sinni að raða flugeldunum upp í rekka, hvað þá að selja þá … og alls ekki að leita að fólki.

Og hvað er til ráða? Fella niður ríkisábyrgð? Setja á ofurskatta? Ég er ekki skattaglaður maður, en óvenjulegur aðstæður kalla á óvenjuleg ráð. Og þingið hefur aðeins eitt verkfæri í þessum efnum, en kosti tvo: Að gera ekkert, eða búa til nýtt skattþrep. Ég segi; við núverandi aðstæður eru laun yfir tveimur milljónum það sem heita má ofurlaun. Og ofurlaun ber að skattleggja öðruvísi en meðallaun. Það gera Bandaríkjamenn og Bretar, rétt eins og Danir og Svíar … en hér á Íslandi hefur alltaf verið til siðs að taka sem mest af meðalmanninum - og skilgreina meðallaun sem ofurlaun.

Mín tillaga er þessi: Gætum hófs, en gerum eitthvað … setjum 50 prósenta skatt á laun hærri en 2 milljónir og notum ávinninginn til að hækka skattleysismörkin upp undir 150 þúsund …

Aðalatriðið er þetta: Það er í góðu lagi að hafa góðar tekjur - og góð samfélög eiga að geta af sér góðar tekjur - en góðar tekjur eiga auðvitað að gefa meira af sér til samfélagsins …

Og svo hitt … í lokin: Formaður Samtaka atvinnulífsins hlýtur að beina sömu orðum til bankastjóra eins og bræðslufólks. “Rugl deilt með tveimur er rugl,” sagði þessi æðsti prestur atvinnulífsins um 13,5 prósenta launahækkunarkröfu bræðslumanna fyrr á árinu.

En hvað með hans eigið æðsta fólk?

Hefur það sjálfdæmi í þessum efnum?

Vísar það veginn?

Hvað getur munurinn á milli orða og athafna æðsta ráðs atvinnulífsins orðið mikill? Mældur í fetum, metrum, prósentum - og siðgæði?

En kannski er þetta einfaldara; akkúrat það að enn sé ekkert slor að vinna í banka …

-SER.

Fjöldi yfirmanna á stofnunum ríkisins hefur ekki lækkað laun sín í samræmi við yfirlýsingar forsætisráðherra þess efnis að enginn ríkisforstjóri þiggi hærri laun en ráðherrann.

Þetta var upplýst á fundi fjárlaganefndar í morgun með fullltrúum Ríkisendurskoðunar og Fjársýslu ríkisins í morgun.

Menn greinir á hvort hér hafi verið um fyrirmæli eða tilmæli að hálfu forsætisráðherra að ræða - og í skjóli þess hafa margir þeirra forstjóra, sem hafa verið með laun yfir miljón, neitað eða látið hjá líða að lækka laun sín. Margir telja sig geta hagrætt með öðrum hætti … og aðrir telja sig vera í samkeppnisrekstri og launakjör þeirra taki mið af öðru umhverfi en t.d. yfirmenn ráðuneyta búa við.

Fjárlaganefnd hefur óskað eftir því að fá lista yfir þá ríkisforstjóra sem hafa neitað að fara að tilmælum / fyrirmælum forsætisráðherra. Og hafa greinilega komist upp með það … í ljósi óljósrar skilgreiningar á orðinu ríkisforstjóri!

Það verður athyglisverður listi …

-SER.

Tvennt kemur til greina með skipulagða glæpahópa sem kunna að vera að hreiðra um sig hér á landi; Outlaws, Hells Angels, Pistons eða hvað þetta nú heitir …

Við þekkjum sögu þesara hópa að utan - og starfsemi þeirra verður ekki öðruvísi á Íslandi.

Já, tvennt. Að leyfa þá, eða banna þá.

Mér finnst seinni kosturinn nær hagsmunum almennings …

-SER.

Ég fór þess formlega á leit í fjárlaganefnd í morgun að nefndin skoðaði álögur ríkisins á bensín og olíu, en verðhækkanir á þessari neysluvöru brenna nú mjög á landsmönnum.

Það kann að vera ávinningur fyrir ríkið nú um stundir að draga úr álögum, enda getur aukin hlutdeild ríkisins í bensínverðinu bitið í skottið á sér. Krónuskattar hafa ekki hækkað en virðisaukaskatturinn fylgir verðlagi - og því er það beinn hagur ríkisins að jarðefnaeldsneytið hækki í verði … eða hvað? Þetta þarf að skoða - og hér þarf að finna skurðpunktinn …

Beiðni mín hefur verið samþykkt og mun fjárlaganefnd rýna í opinberar álögur í þessum geira síðar í vikunni. Allar álögur ríkisins eiga að vera til skoðunar hverju sinni, enda sjálfsagður hlutur af eftirlitskerfi Alþingis …

-SER.

Ríkissjóður hefur borð fyrir báru þegar kemur að innheimtu olíugjalda. Eðlilegt er að hann verði ekki af áætluðum tekjum, samkvæmt fjárlögum, en ávinningur hans af þeim svimandi háu verðhækkunum á þessari miklivægu neysluvöru á ekki að vera úr hófi fram.

Það bitnar á fólki og fyrirtækjum, byggðum og byggðaþróun.

Ríkissjóður á ekki að hafa sérstakan hag af því að olíu- og bensínverð hækki upp úr öllu valdi. Ég hef áður nefnt möguleika á tímabundinni lækkun virðisaukaskatts, sem leggst hlutfallslega ofan á önnur gjöld ríkisins af þessari vöru - og þar með verðhækkanahvetjandi … en það kann vissulega að vera flókið í framkvæmd. Aðrar leiðir eru færar, svo sem tímabundin lækkun á beinum gjöldum, en að þessu sögðu er þó brýnt að tefja málið ekki svo vikum skiptir í starfshópi. Hér þarf aðgerðir, fljótt og vel …

Fyrir því mun ég tala á Alþingi í dag …

-SER.

Nokk er ég stoltur af flokki mínum að velja nýtt fólk í landskjörsstjórn - og það þaulvana lögmenn sem þekkja til þrauta lýðræðisins, jafnvel svo áratugum skiptir. Freyr Ófeigsson og Sigrún Benediktsdóttir eru valin af fagmennsku fremur en pólitík.

Vinstri grænir bera ábyrgð á því að velja aftur sinn mann í landskjörsstjórn. Það er önnur saga - og þeirra saga …

-SER.